Num 9 | NdeIBE | STEP | Ngenyanga yakuqala ngomnyaka wesibili ngemva kokuphuma kwabo eGibhithe uJehova wakhuluma loMosi eNkangala yaseSinayi, wathi,

Numbers 9

IPhasika

1 Ngenyanga yakuqala ngomnyaka wesibili ngemva kokuphuma kwabo eGibhithe uJehova wakhuluma loMosi eNkangala yaseSinayi, wathi, 2 “Yenza abako-Israyeli bagcine umkhosi wePhasika ngesikhathi esimisiweyo. 3 Gcinani umkhosi walo ngesikhathi esimisiweyo, kusihlwa ngosuku lwetshumi lane lwayonale inyanga, ngokwezimiso kanye lemithetho yawo.”

4 Ngakho uMosi watshela abako-Israyeli ukuthi bagcine umkhosi wePhasika, 5 benza njalo kusihlwa ngosuku lwetshumi lane lwenyanga yakuqala eNkangala yaseSinayi. Abako-Israyeli benza konke njengokulaywa kukaMosi nguJehova.

6 Kodwa abanye babo abazange bagcine umkhosi wePhasika ngalolosuku ngoba babengcolile ngokomlayo ngenxa yesidumbu. Ngakho beza kuMosi lo-Aroni ngalolosuku

7 bathi kuMosi, “Sesingcolile ngenxa yesidumbu, kambe kungani sinqatshelwa ukwethula umnikelo kaJehova kanye labanye bako-Israyeli ngesikhathi esimisiweyo na?”

8 UMosi wabaphendula wathi, “Manini, ukuze ngizwe ukuthi uJehova uzakuthini ngani.”

9 Ngakho uJehova wathi kuMosi, 10 “Tshono kwabako-Israyeli uthi: ‘Nxa loba ngubani wakini kumbe izizukulwane zenu engcoliswe yisidumbu kumbe ethethe uhambo, angagcina umkhosi wePhasika likaJehova. 11 Bangagcina lumkhosi kusihlwa ngosuku lwetshumi lane lwenyanga yesibili. Kabadle iwundlu, kanye lesinkwa esingelamvubelo lemibhida ebabayo.

12 Bangatshiyi lutho lwakho kuze kuse kumbe ukwephula loba yiliphi lamathambo alo. Nxa begcina umkhosi wePhasika, kabalandele yonke imithetho yalo. 13 Kodwa nxa umuntu ehlambulukile ngokomlayo njalo engekho ehanjeni ehluleke ukugcina umkhosi wePhasika, lowo muntu kasuswe ebantwini bakibo ngoba engethulanga umnikelo kaJehova ngesikhathi esimisiweyo. Lowomuntu uzathwala umvuzo wesono sakhe.

14 “ ‘Owezizweni ohlala phakathi kwenu ofuna ukugcina umkhosi wePhasika kakwenze ngokwezimiso kanye lemithetho yalo. Wobani lezimiso zinye kowezizweni kanye langowenzalo yakini.’ ”

Iyezi phezu kweThabanikeli

15 Ngosuku okwamiswa ngalo ithabanikeli, iThente lobuFakazi, iyezi lalisibekela. Kusukela kusihlwa kuze kuse iyezi elaliphezu kwethabanikeli linjengomlilo. 16 Laqhubeka linjalo; lembeswe liyezi, ebusuku lalinjengomlilo. 17 Ngesikhathi sonke lapho iyezi liphakama lisuka phezu kweThente, abako-Israyeli labo babesuka bahambe kuthi lapho elima khona, abako-Israyeli bamise izihonqo zabo khona. 18 Abako-Israyeli babesuka bahambe ngokulaya kukaJehova, kuthi njalo ngokulaya kwakhe bamise izihonqo zabo. Ngesikathi sonke iyezi limi phezu kwethabanekeli, abako-Israyeli bahlala ezihonqweni zabo. 19 Lapho iyezi lihlala isikhathi eside phezu kwethabanikeli, abako-Israyeli bamlalela uJehova abaze bahamba.

20 Kwesinye isikhathi iyezi lalisima phezu kwethabanikelei okwezinsukwana nje kuphela; ngokulaya kukaJehova babehlala ezihonqweni khonapho, kuthi njalo ngokulaya kwakhe basuke bahambe. 21 Kwesinye isikhathi iyezi lalisima kusukela kusihlwa kuze kuse, kuthi nxa lisuka ekuseni, labo bahambe. Kungakhathalekile ukuthi kusemini loba kusebusuku, sonke isikhathi lapho iyezi lisuka babesuka bahambe.

22 Loba iyezi lalisima phezu kwethabanikeli okwezensuku ezimbili, kumbe okwenyanga eyodwa kumbe umnyaka, abako-Israyeli babehlala khonapho ezihonqweni bangasuki; kodwa nxa lingasuka, labo babesuka.

23 Ngokulaya kukaJehova babehlala ezihonqweni, langokulaya kwakhe njalo babesuka bahambe. Balalela okwakutshiwo nguJehova ngokulaya kwakhe ngoMosi.